సూపర్ స్టార్ రజనీకాంత్ జీవిత విశేషాలను తెలియజేస్తూ 'తలైవర్' పేరుతో ఓ డాక్యుమెంటరీ రూపొందింది. రజనీ వీరాభిమాని కవిన్ కార్తీక్ రూపొందించిన ఈ డాక్యుమెంటరీని రజనీ స్వయంగా చెన్నైలోని రాఘవేంద్ర మండపంలో రిలీజ్ చేశారు.
రజనీ తొలినాళ్లలో బెంగుళూరులో బస్ కండక్టర్ గా పనిచేసినప్పటి నుంచి...సూపర్ స్టార్ డమ్ ను కైవసం చేసుకున్నంతవరకూ ఆయన జీవితంలోని కీలక దశలను ఆవిష్కరిస్తూ ఈ డాక్యుమెంటరీ రూపొందింది. డాక్యుమెంటరీ ఆలోచన రాగానే కార్తీక్ నేరుగా రజనీని కలుసుకుని ఆ విషయాన్ని ఆయనకు తెలియజేశారు.కొంత కీలక సమాచారాన్ని ఆయన వద్ద నుంచి సేకరించారు. రజనీ జీవిత విశేషాలతో పాటు ఆయన సన్నిహిత మిత్రుడు, ప్రముఖ జర్నలిస్టు ఛో రామస్వామి ఇంటర్వ్యూ కూడా ఇందులో చోటుచేసుకుంది. ఈ ముఖాముఖీలో రజనీ రాజకీయాల్లోకి అడుగుపెట్టే అవకాశాలపై ముచ్చటించారు. మరో నెలలో ఈ డాక్యుమెంటరీ డివిడి రూపంలో మార్కెట్ లోకి రానుంది.
