హైదరాబాద్: వెండితెర ‘వరుడు’ అల్లు అర్జున్, స్నేహారెడ్డిల నిశ్చితార్థం అంగరంగ వైభవంగా జరిగింది. శుక్రవారం రాత్రి హైదరాబాద్ మాదాపూర్‌లోని నొవాటెల్ హోటల్‌లో కన్నులపండువగా జరిగిన వీరి నిశ్చితార్థానికి సినీ, రాజకీయ రంగ ప్రముఖులు తరలివచ్చి, యువజంటకు తమ ఆశీస్సులను అందజేశారు. ప్రముఖ సినీ నిర్మాత అల్లు అరవింద్ తనయుడైన అల్లు అర్జున్ వివాహం ఎస్‌సీఐఈఎన్‌టీ ఇంజనీరింగ్ కళాశాల అధినేత కె.శేఖర్‌రెడ్డి కుమార్తె స్నేహారెడ్డితో నిశ్చయమైన సంగతి తెలిసిందే. పెళ్లి తేదీని ఇంకా ఖరారు చేయలేదు. వచ్చే ఫిబ్రవరిలో వీరి వివాహం జరిగే అవకాశాలున్నాయి. నిశ్చితార్థం వేడుకకు యువజంట కుటుంబ సభ్యులతోపాటు పీఆర్పీ అధినేత చిరంజీవి, సినీ రంగ ప్రముఖులు మోహన్‌బాబు, నాగార్జున, డి.రామానాయుడు, రవితేజ, రామ్‌చరణ్, నాగచైతన్య, రానా, మురళీమోహన్, పూరీ జగన్నాథ్, తదితరులు హాజరయ్యారు. డి.శ్రీనివాస్, కె.కేశవరావు, జానారెడ్డి, భూమానాగిరెడ్డి, కోటగిరి విద్యాధరరావు, తదితర ప్రముఖులు పాల్గొన్నారు.
