రోబో’ సినిమాలో ఐశ్వర్య రాయ్ తో చేసిన ఆన్ స్క్రీన్ రొమాన్స్ సరిపోలేదేమో, ఇంకోసారి ఐశ్వర్య తో ఆన్ స్క్రీన్ రొమాన్స్ చేసేందుకు తెగ సంబరపడిపోతున్నాడట హీరో రజనీకాంత్. ఈ విషయాన్ని రజనీకాంతే స్వయంగా చెప్పుకొచ్చాడు. ‘ఐశ్వర్యరాయ్ లాంటి అందగత్తెతో కలిసి పనిచేయాలనేది ఎవరికైనా గొప్ప విషయమే. అందుకు నేనూ అతీతమేమీ కాదు..’అంటూ ఐశ్వర్య రాయ్ ని రజనీ ఆకాశానికెత్తేశాడు. తన తదుపరి చిత్రం కోసం దీపికా పదుకొనే, త్రిష, అసిన్ ల పేర్లను పరిశీలిస్తోన్న రజనీకాంత్, పనిలో పనిగా ఓ చిన్న పాత్రలో అయినా ఐష్ తో నటింపజేయాలనుకుంటున్నాడు. ‘రోబో’ ని మించేలా తన తదుపరి చిత్రం వుండబోతోందనీ, దర్శకుడు కెఎస్ రవికుమార్ చెప్పిన కథ అత్యద్భుతమనీ రజనీకాంత్ చెబుతున్నాడు. ఈ సినిమాలో రజనీకాంత్ ద్విపాత్రాభినయం చేస్తుండగా, త్రిష, దీపికా పదుకొనే హీరోయిన్లుగా నటించడం దాదాపు ఖాయమే.
