రాంగోపాల్ వర్మ దర్శకత్వంలో రూపొందుతున్న కథ-స్క్రీన్ ప్లే-దర్శకత్వం: అప్పల్రాజు చిత్రాన్ని ఈ నెల 18న విడుదల చేయడానికి సన్నాహాలు చేస్తున్నారు. సునీల్, స్వాతి, సాక్షి ఇందులో హీరోహీరోయిన్లు. వందిత కోనేరు సమర్పణలో శ్రేయ నిర్మాణంలో కిరణ్ కుమార్ కోనేరు ఈ చిత్రాన్ని నిర్మిస్తున్నారు. నిర్మాత మాట్లాడుతూ... సినిమా మొత్తం సినిమా నేపథ్యంగానే సాగుతుంది. సినిమాలంటే ప్రాణం పెట్టే ఓ ప్రేక్షకుడు దర్శకునిగా మారి ఎలాంటి సంచలనాలకు కేంద్ర బిందువు అయ్యాడన్నదే ఈ చిత్రం ప్రధాన కథాంశం. వినోదానికి పెద్ద పీట వేశాం. వారానికో పాట చొప్పున ఆరు పాటలను మార్కెట్లోకి విడుదల చేశాం. ఇటీవలే మొత్తం పాటలను విడుదల చేశాము. రాంగోపాల్ వర్మ ఈ చిత్రం ద్వారా పాటల రచయితగా పరిచయం కావడం విశేషం. వర్మ మార్కు వినోదం ప్రేక్షకులను కచ్చితంగా ఆకట్టుకుంటుంది. నిర్మాణానంతరం కార్యక్రమాలు తుది దశకు చేరుకున్నాయి. ఈ నెల 18న చిత్రాన్ని విడుదల చేయబోతున్నాం అని తెలిపారు. బ్రహ్మానందం, కోట శ్రీనివాసరావు, అలీ, తనికెళ్ల భరణి, ఎమ్మెస్ నారాయణ, ధర్మవరపు సుబ్రహ్మణ్యం, రఘుబాబు, వేణు మాధవ్ తదితరులు నటించారు.
