‘‘చక్రి చాలా బిజీగా ఉన్నారు. అందుకని ఆయన స్థానంలో ‘తాజా సెన్సేషన్’ తమన్‌ని సంగీత దర్శకుడిగా తీసుకున్నాం అంటున్నారు హీరో రామ్. ఆయన తన తాజా చిత్రం ‘కందిరీగ’ కు సంగీత దర్శకుడుగా తమన్ ని పట్టుబట్టి మరీ తీసుకున్నట్లు సమాచారం. ఈ చిత్రానికి ముందుగా చక్రిని సంగీత దర్శకుడిగా ఎన్నుకున్నారు.‘దేవదాసు, మస్కా’ చిత్రాల తర్వాత రామ్ కాంబినేషన్‌లో చక్రి చేస్తున్న సినిమాగా మొదట ప్రకటించారు. అయితే ఇప్పుడు చక్రి స్థానంలో తమన్‌ని సంగీత దర్శకుడిగా తీసుకోవటంతో ఆ విషయం గురించి రామ్ తన ట్విట్టర్‌లో ఇలా వివరణ ఇచ్చారు. వాసు దర్శకత్వంలో బెల్లంకొండ సురేష్ ఈ చిత్రాన్ని నిర్మిస్తున్నారు. ఈ చిత్రం కోసం ప్రేమ రక్షిత్ నృత్య దర్శకత్వంలో నిన్నటి(ఆదివారం) నుంచి ఒక పాటని షూట్ చేస్తున్నారు. అలాగే ఈ పాటకి సంబంధించిన ట్యూన్ ముందుగా రెడీ అవ్వకపోవడంవల్ల స్టెప్స్ ప్రాక్టీస్ చేయలేదు. డెరైక్ట్‌గా లొకేషన్‌లోనే నేర్చుకుని స్టెప్స్ వేయబోతున్నాం అని ట్వీట్ చేశారు. ఈ చిత్రంలో రామ్ సరసన హన్సిక హీరోయిన్ గా చేస్తోంది.
