గత 2009వ సంవత్సరం ప్రారంభంలో పరిశ్రమనంతా ఒక్కసారిగా తనవైపు తిప్పుకునేలా చేసిన చిత్రం 'అరుంధతి'. ఆ చిత్రంలో నటి అనుష్కకు ఎంత పేరు వచ్చిందో, ఫ్లాష్‌బ్యాక్‌లో వచ్చే అరుంధతి ఎపిసోడ్‌లో బాల అరుంధతి పాత్రలో నటించిన దివ్యకు కూడ అంత పేరొచ్చింది. అరుంధతి తర్వాత బాల నటిగా ఎన్నో ఆఫర్స్‌ వచ్చిన వాటిని సున్నితంగా తిరస్కరించి త్వరలో హీరోయిన్‌గా మనముందుకు రాబోతోంది. 'బాల' చిత్రంతో దర్శకుడిగా మనకు పరిచయమైన 'గోవింద్‌ వరహా' దర్శకత్వంలో శ్రీ రాజ రాజేశ్వరి సోమేశ్వర ప్రొడక్షన్స్‌ పతాకంపై కె.నాగిరెడ్డి సమర్పణలో 'శుభప్రదం' చిత్ర నిర్మాతల్లో ఒకరైన పి.ఎన్‌.తిలక్‌ నిర్మాతగా అరుంధతి ఫేం దివ్య, ఫోటో ఫేం నందు హీరో, హీరోయిన్లుగా రూపొందనుంది. ప్రేమ కథా చిత్రాల్లో ఒక డిఫరెంట్‌ ఫీల్‌ ఉన్న సబ్జెక్ట్‌తో రూపొందనున్న ఈ చిత్రం ఈ నెల 24న అన్నపూర్ణ స్టూడియోలో పలువురు సినీ ప్రముఖుల మధ్య ప్రారంభించనున్నామని దర్శకనిర్మాతలు వెల్లడించారు. ఈ చిత్రానికి చిన్ని చరణ్‌ సంగీతం అందిస్తుండగా ఆర్ట్‌ డైరెక్టర్‌‌గా చిన్న వ్యవహరిస్తున్నారు. మిగతా వివరాలు ఓపెనింగ్‌ రోజున తెలియపరుస్తామని నిర్మాతలు తెలిపారు.
