పవన్ కళ్యాణ్ ‘తీన్ మార్’ సినిమా విడుదలకి దగ్గరయ్యే కొద్దీ కొత్త కొత్త విశేషాలు బయటకి వస్తూ చిత్రంపై క్రేజ్ ని పెంచేస్తున్నాయి. తాజా సమాచారం ప్రకారం ఈ చిత్రంలో చిరంజీవి నటించిన ‘రౌడీ అల్లుడు’ సినిమాలోని ‘చిలుకా క్షేమమా’పాట రీమిక్స్ చేసినట్టు తెలుస్తోంది. చిరంజీవి ఆల్ టైమ్ హిట్స్ లో ఒకటైన ఈ పాటంటే పవన్ కళ్యాణ్ కి చాలా ఇష్టం. చిరంజీవి పాటల్లో తనకేది ఇష్టమైన పాటని అడిగితే ‘చిలుకా క్షేమమా’ గురించి పలు మార్లు పవన్ చేప్పాడు. ఇప్పుడా పాటని మణిశర్మ చేత రీమిక్స్ చేయించుకుని తన ఇష్టాన్ని మరోసారి చాటుకుంటున్నాడు. రీమిక్స్ స్సెషలిస్ట్ గా పేరు పడ్డ మణిశర్మ ఈ పాటకి సరికొత్త రంగు,రుచి, వాసనలని ఇస్తాడని ఆశించవచ్చు. ఎందుకంటే ఇంతకు ముందు కూడా పవన్ కళ్యాణ్ నటించిన ఖుషి, గుడంబా శంకర్ చిత్రాలకు చక్కటి సంగీతాన్ని అందించి ప్రేక్షకుల మన్ననలు పొందిన విషయం తెలిసిందే. పవన్ సినిమాల్లో రీమిక్స్, ఇంగ్లీష్ పాటలుంటే అవి హిట్ అయిన సందర్బాలెక్కువగా ఉన్నాయి. ఆ సెంటిమెంట్స్ అన్నీ ‘తీన్ మార్’లో తు.చ. తప్పకుండా పాటిస్తున్నారు. అల్లు అర్జున్ వివాహ వేడుక ముగిసిన తర్వాత పవన్ కళ్యాణ్ ఈ చిత్రానికి సంబంధించిన బ్యాలెన్స్ సాంగ్స్ షూటింగ్ లో పాల్గొంటాడు.
